Ministret e Punëve të Jashtme të shteteve pjesëmarrëse të Konferencës së Sigurisë shprehin shqetësimet më të thella për shkeljet e vazhdueshme të të drejtave të njeriut, grave dhe vajzave në Afganistan dhe u bëjnë thirrje autoriteteve që t’i japin fund persekutimit sistematik gjinor, i cili mund të çojë në krime kundër njerëzimit.

Ministria me anë të një njoftimi bën të ditur se kjo është thirrja e deklaratës së përbashkët që zëvendëskryeministrja dhe ministrja e Punëve të Jashtme dhe Diasporës të Kosovës, Donika Gërvalla, bashkë me ministret e Punëve të Jashtme të shteteve pjesëmarrëse të Konferencës së Sigurisë, miratuan në mbështetje të grave dhe vajzave afgane, përcjell Arbresh.info.

“Kjo deklaratë e mbështetur edhe nga Ministri i Punëve të Jashtme të Francës dhe ai i Shqipërisë është vazhdimësi e thirrjes që edhe vitin e kaluar gratë Ministre kishin bërë për talibanët dhe deklarata e këtij viti konstaton që talibanët nuk kanë bërë asnjë përparim në mbrojtjen e të drejtave të njeriut në Afganistan, veçanërisht të drejtat themelore të grave dhe vajzave”, thuhet në komunikatë.

Tutje bëhet e ditur se përmes kësaj deklarate gratë udhëheqëse të diplomacisë së shteteve, të udhëhequra nga ministrja e Punëve të Jashtme të Gjermanisë, Annalena Baerboc dhe ministrja e Punëve të Jashtme të Kanadasë, Mélanie Jol, u bëjnë thirrje talibanëve që të lejojnë vajzat afgane të ndjekin arsimin e mesëm, në përputhje me standardet ndërkombëtare./Arbresh.info/